ప్రపంచ బ్యాడ్మింటన్ ఛాంపియన్ షిప్ లో స్వర్ణం గెలిచిన సింధు

భారత స్టార్‌ షట్లర్‌, తెలుగు తేజం పివి సింధు చరిత్ర సృష్టించింది. ప్రపంచ బ్యాడ్మింటన్‌ ఛాంపియన్‌షిప్‌ 2019 మహిళల సింగిల్స్‌ ఫైనల్లో విజేతగా నిలిచి సరికొత్త రికార్డు నెలకొల్పింది. ఆదివారం జరిగిన ఫైనల్స్‌లో జపాన్‌ క్రీడాకారిణి ఒకుహరపై సింధు అద్భుత ఆటతో 21-7, 21-7 తేడాతో ఘనవిజయం సాధించింది. దీంతో వరల్డ్‌ ఛాంపియన్‌షిప్‌లో గోల్డ్‌ మెడల్‌ సాధించిన తొలి భారత క్రీడాకారిణిగా సింధు నిలిచింది. 2017, 2018 ఫైనల్లో ఓటమిపాలైన సింధు, తాజాగా జరిగిన ఫైనల్లో ప్రత్యర్థికి చెమటలు పట్టించి ఛాంపియన్‌గా తన కలను నెరవేర్చుకుంది.తొలి రౌండ్‌ను కేవలం 16 నిమిషాల్లోనే ముగించిన సింధు… రెండో రెండో రౌండ్‌లోనూ అదరగొట్టింది. మొత్తంగా 38 నిమిషాల్లో ఈ గేమ్‌ను ముగించి టైటిల్ ను సొంతం చేసుకుంది.

రూ.20 లక్షల రివార్డ్ ప్రకటించిన బాయ్‌…

టోర్నీలో పతకాలు సాధించిన సింధు, సాయిప్రణీత్‌కు భారత బ్యాడ్మింటన్‌ సమాఖ్య (బాయ్‌) నజరానా ప్రకటించింది. గోల్డ్ మెడల్ కొల్లగొట్టిన సింధుకు రూ.20 లక్షల రివార్డ్, సాయిప్రణీత్‌కు రూ.5 లక్షల రివార్డ్‌ ప్రకటించింది. కర్ణాటక సిఎం యడియూరప్ప, సింధుకు రూ.5లక్షల బహుమానం ప్రకటించారు.

 ప్రముఖుల అభినందన పరంపర

ప్రపంచ బ్యాడ్మింటన్ చాంపియన్‌షిప్‌లో తొలి స్వర్ణం గెలిచిన తొలి భారత షట్లర్‌గా చరిత్ర సృష్టించిన తెలుగు తేజం సింధుకు రాష్ట్రపతి రామ్‌నాథ్ కోవింద్, ఉపరాష్ట్రపతి వెంకయ్య నాయుడు, ప్రధాని నరేంద్ర మోదీ, కేంద్ర మంత్రులు, తెలంగాణ గవర్నర్ నరసింహన్, మంత్రులు ఈటల రాజేందర్, శ్రీనివాస్ గౌడ్, శాట్స్ చైర్మన్ అల్లీపురం వెంకటేశ్వర్ రెడ్డి, స్వీకర్ పోచారం, టిఆర్‌ఎస్ వర్కింగ్ ప్రెసిడెంట్ కెటిఆర్, ఎమ్మెల్యే హరీశ్ రావు, తదితరులు అభినందనలు తెలియజేశారు.