ఆర్టికల్ 370,ఆర్టికల్ 35A రద్దుపై మెహబూబా ముఫ్తీ మండిపాటు

ఆర్టికల్ 370,ఆర్టికల్ 35Aను రద్దు చేయడంపై జమ్మూకశ్మీర్ మాజీ సిఎం, పిడిపి అధినేత్రి మెహబూబా ముఫ్తీ మండిపడ్డారు. సోమవారం భారత ప్రజాస్వామ్యంలోనే చీకటి రోజు అని ఆమె పేర్కొన్నారు.  రెండు జాతులు-రెండు దేశాల సిద్ధాంతాన్ని వ్యతిరేకించి 1947లో  జమ్మూకశ్మీర్ భారత్ తో చేతులు కలిపిందని,  నాడు తీసుకున్న నిర్ణయం ఇప్పడు  కశ్మీరీల పాలిట ప్రాణసంకటంగా మారిందని ఆమె ఆవేదన వ్యక్తం చేశారు. ఆర్టికల్ 370 రద్దు ఏకపక్ష నిర్ణయమని ఆమె ధ్వజమెత్తారు. ఈ ఆర్టికల్ ను రద్దు చేయడం రాజ్యాంగ విరుద్ధమని , దీంతో జమ్మూకశ్మీర్ లోకి దురాక్రమణదారులు ప్రవేశిస్తారని ఆమె పేర్కొన్నారు. జమ్మూకశ్మీర్ ను రెండుగా విభజిస్తూ కేంద్రం నిర్ణయం తీసుకోవడం వల్ల భారత ఉపఖండం భగ్గమంటుందని ఆమె తెలిపారు. జమ్మూకశ్మీర్ ప్రజలను భయపెట్టి కేంద్రం ఏకపక్షంగా వ్యవహరిస్తుందని ఆమె ఆరోపించారు. కశ్మీర్ ప్రజలకు ఇచ్చిన హామీలను నిలబెట్టుకోవడంలో కేంద్రం ఘోరంగా వైఫల్యం చెందిందని ఆమె ధ్వజమెత్తారు. జమ్మూకశ్మీర్ విషయలో కేంద్రం తీసుకున్న నిర్ణయాన్ని తక్షణమే వెనక్కి తీసుకోవాలని ఆమె డిమాండ్ చేశారు.