మొదటి టెస్ట్ లో భారత్ ఘన విజయం

వెస్టిండీస్ తో జరుగుతున్న తొలి టెస్టు మ్యాచ్లో టీమిండియా 318 పరుగుల భారీ తేడాతో ఘన విజయం సాధించింది. భారత్ నిర్ధేశించిన 419 పరుగుల భారీ లక్ష్య ఛేదనకు దిగిన వెస్టిండీస్‌, బుమ్రా(5/7) దెబ్బకు 100 పరుగులకే కుప్పకూలింది. భారత బౌలర్లు ధాటికి విండీస్ ఆటగాళ్లు వరుసగా పెవిలియన్కు క్యూకట్టారు. విండీస్ ఓపెనర్లు బ్రాత్‌వైట్‌(1), క్యాంప్‌బెల్‌(7)తో పాటు బ్రోక్స్(2), డారెన్ బ్రావో(2) హెట్మెయర్(1)లు తక్కువ స్కోరుకే ఔటయ్యారు. దీంతో కేవలం జట్టు స్కోరు 15 వద్దే 5 వికెట్లు కోల్పోయి విండీస్ పీకల్లోతు కష్టాల్లో పడింది. వీరి ఆటచూస్తే 50 పరుగులలోపే ఆలౌట్ అయ్యేలా కనిపించారు. కానీ, చివర్లో కీమర్‌ రోచ్‌(38; 31బంతుల్లో 1×4, 5×6), కమిన్స్‌(19; 22బంతుల్లో 2×4, 1×6)లు భారత బౌలర్లపై ఎదురుదాడికి దిగారు. ఇద్దరూ మెరుపు షాట్లతో విరుచుకుపడ్డారు. దీంతో విండీస్ 100 పరుగులు చేసి ఆలౌట్ అయ్యింది. బుమ్రా కేవలం 7 పరుగులే ఇచ్చి 5 వికెట్లు పడగొట్టాడు. బుమ్రాతో పాటు ఇషాంత్‌ (3/31), షమి (2/13)లు కూడా చెలరేగడంతో విండీస్ పేక మేడలా కుప్ప కూలింది. దీంతో రెండు టెస్టుల సిరీస్‌లో 1-0 ఆధిక్యంలో భారత్ నిలిచింది.

అంతకుముందు 185/3తో నాలుగో రోజు ఆటను ప్రారంభించిన భారత్‌ మరో 158 పరుగులు జోడించిన అనంతరం 343/7 స్కోరు వద్ద కెప్టెన్ కోహ్లీ ఇన్నింగ్స్ డిక్లేర్‌ చేశాడు. అజింక్య రహానె(102) అద్భుత శతకంతో మెరిశాడు. హనుమ విహారి(93), విరాట్ కోహ్లీ(51)లు అర్థ సెంచరీతో రాణించారు.