జల దిగ్బంధంలో ఉత్తర కర్ణాటక

భారీ వర్షాల నేపథ్యంలో ఉత్తర కర్ణాటక జిల్లాల్లో నీటి ప్రవాహం ఎక్కువైంది. మహారాష్ట్రలో కురుస్తున్న భారీ వర్షాలు, కొయ్నా ఆనకట్ట నుంచి నీటిని విడుదల చేయడంతో ఈ పరిస్థితి తలెత్తింది. సుమారు 40 గ్రామాలు జలదిగ్బంధంలో చిక్కుకోవడంతో ఆయా గ్రామాలకు రాకపోకలు నిలిచిపోయాయి. నీటి ప్రవాహంతోపాటు గ్రామాల్లోకి పాములు, మొసళ్లు వచ్చాయి. యడూరు వీరభద్రేశ్వర ఆలయం, బసవేశ్వర ఆలయాల్లోకి ఘటప్రభ నది నీరు ప్రవేశించింది. యాదగిరి జిల్లా కొల్లూరు వద్ద వరద నీరు వంతెనను తాకుతూ ప్రవహించింది. పశ్చిమ కనుమల్లోని చార్ముడి ఘాట్లో కొండచరియలు విరిగి పడడంతో వాహన రాకపోకలకు అంతరాయం కలిగింది. బెళగావి జిల్లా చిక్కోడి వద్ద కృష్ణా నదీ ప్రవాహం ఉగ్ర రూపాన్ని సంతరించుకుంది. బాగలకోటె, విజయపుర, బెళగావి జిల్లాల్లో విద్యా సంస్థలకు సెలవులు ప్రకటించారు.