సెప్టెంబర్ 1 నుంచి అమల్లోకి రానున్న నూతన మోటారు వాహనాల చట్టం

నూతన మోటారు వాహనాల చట్టం సెప్టెంబర్ 1 నుంచి అమల్లోకి రానుంది. దీనికి సంబంధించిన గెజిట్ నోటిఫికేషన్ ను కేంద్ర ప్రభుత్వం విడుదల చేసింది. రోడ్డు ప్రమాదాల నివారణే లక్ష్యంగా నూతన మోటారు వాహనాల సవరణ చట్టం 2019 ని రూపొందించారు. ముందుగా 28 నిబంధనలను సెప్టెంబర్ 1 నుంచి అమలు చేయనున్నారు. మరికొన్నింటిని ముసాయిదా రూపొందించి, ప్రజాభిప్రాయ సేకరణ తర్వాత అమలు చేయనున్నారు. ఈ నూతన చట్టంలో మరో కీలక నిబంధనను చేర్చారు. ద్విచక్రవాహనం పై వెళ్లే 4 ఏళ్లలోపు పిల్లలు కూడా హెల్మెట్ ధరించాల్సి ఉంటుంది. ఈ నిబంధనని పాటించని వారి పై రూ. 500 నుంచి రూ. 10 వేల రూపాయల వరకు ఫైన్, 6 నెలల జైలు శిక్ష విధిస్తారు. 
 
కొత్తగా వచ్చిన ట్రాఫిక్ నిబంధనలు ఈ విధంగా ఉండనున్నాయి.
 
- ప్రస్తుతం సీటు బెల్ట్ ధరించకపోతే 100 రూపాయల ఫైన్ ఉండగా ఇక నుంచి అది 1000 రూపాయలు కానుంది. 
 
- ప్రస్తుతం హెల్మెట్ ధరించకపోతే 100 రూపాయల ఫైన్ ఉండగా ఇక నుంచి అది 1000 రూపాయలు కానుంది. 
 
- అంబులెన్స్ లు, అత్యవసర వాహనాలకు దారివ్వకపోతే ప్రస్తుతం ఎటువంటి ఫైన్ లేదు. కానీ ఇక నుంచి 10 వేల రూపాయల ఫైన్ విధించనున్నారు. 
 
- వాహనాలను అతివేగంగా నడిపిన, బైక్ రేసింగ్ లకు పాల్పడితే ప్రస్తుతం 500 రూపాయల ఫైన్ విధిస్తున్నారు. ఇక నుంచి 5000 రూపాయల ఫైన్ విధిస్తారు. 
 
- లైసెన్స్ లేకుండా డ్రైవింగ్ చేస్తే ప్రస్తుతం 500 రూపాయల ఫైన్ విధిస్తున్నారు. ఇక నుంచి 5000 రూపాయలు విధించనున్నారు. 
 
- డ్రంక్ అండ్ డ్రైవ్ చేసి వాహనం నడిపితే ప్రస్తుతం 2 వేల రూపాయల ఫైన్ విధిస్తున్నారు. ఇక నుంచి 10 వేల రూపాయల ఫైన్ విధించనున్నారు. 
 
- ఓవర్ లోడ్ తో వెళ్లే వాహనాలకు ప్రస్తుతం 2 వేల రూపాయల ఫైన్ విధిస్తున్నారు. ఇక నుంచి 20 వేల రూపాయల ఫైన్ విధించనున్నారు. 
 
- మైనర్లు వాహనం నడుపుతూ పట్టుబడితే ప్రస్తుతం ఎటువంటి ఫైన్ లేదు. కానీ ఇక నుంచి 25 వేల రూపాయలు ఫైన్ విధించనున్నారు. 
 
- ట్రాఫిక్ లైన్ జంప్ చేసినా, సెల్ ఫోన్ లో మాట్లాడుతూ డ్రైవ్ చేసినా, రాంగ్ రూట్ లో ఓవర్ లోడ్ తో వెళ్లినా ప్రస్తుతం 1000 రూపాయల ఫైన్ విధిస్తున్నారు. ఇక నుంచి 5 వేల రూపాయల ఫైన్ విధించనున్నారు.
 
 - నిర్ణీత సంఖ్య కంటే ఎక్కువమంది ప్రయాణికులను ఎక్కించుకొనే వాహనాలకు ఒక్కో ప్రయాణికుడిపై రూ.200 చొప్పున జరిమానా విధించడంతోపాటు, అదనపు ప్రయాణికులకు ప్రత్యామ్నాయ రవాణా సౌకర్యం కల్పించిన తర్వాతే ముందుకు వెళ్లేందుకు అనుమతిస్తారు.