లక్ష్మణ్ పై రేవంత్ రెడ్డి ఫైర్

బీజేపీ రాష్ట్ర అధ్యక్షుడు లక్ష్మణ్ పై టీపీసీసీ నేత రేవంత్ రెడ్డి ప్రశ్నల వర్షం కురిపించారు. బుధవారం గాంధీ భవన్ లో మాట్లాడిన రేవంత్ రెడ్డి టీఆర్ఎస్, బీజేపీ తెర వెనుక నాటకాలాడుతున్నాయని విమర్శించారు. ఆయన మాట్లాడుతూ..… “టీఆర్ఎస్, బీజేపీ విద్యుత్ కొనుగోళ్ల వ్యవహారం పై ఆరోపణలు చేసుకుంటూ తెర వెనుక నాటకాలాడుతున్నాయి. విద్యుత్ కొనుగోళ్లలో అవినీతి జరిగిందంటున్న బీజేపీ లక్ష్మణ్ సీబీఐ విచారణకు ఎందుకు డిమాండ్ చేయడంలేదు. రాష్ట్రంలో కొత్తగా నిర్మిస్తున్న విద్యుత్ ప్లాంట్లు భద్రాద్రి, యాదాద్రి, కొత్తగూడెం పనుల విలువ మొత్తం. రూ.32,600 కోట్లు. ఈ పనులను నామినేషన్ పద్దతితో బీహెచ్ ఈ ఎల్ కు అప్పగించారు. ఇన్నివేల కోట్ల పనులను టెండర్లు లేకుండా నామినేషన్ పద్దతిలో ఎలా అప్పగిస్తారు. విద్యుత్ కొనుగోళ్లు, ఒప్పందాల పై ఆధారాలతో సహా నిరూపించి ప్రధాని, కేంద్ర హోంశాఖ, నిఘా సంస్థలకు, రాష్ట్ర బీజేపీ శాఖకు కూడా ఫిర్యాదు చేస్తాం. ప్రజా క్షేత్రంలో బీజేపీ, టీఆర్ఎస్ అవినీతిని ఎండగడుతాం. ఒకరిని ఒకరు కాపాడుకునే విధంగా టీఆర్ఎస్, బీజేపీ నాటకాలాడుతున్నాయి.” అని రేవంత్ రెడ్డి విమర్శించారు.