మరో రికార్డు బద్దలు కొట్టిన చైనా

ఎత్తైన ప్రదేశాల్లో గాజు వంతెన నిర్మించిన చైనా మరో రికార్డు బద్దలు కొట్టింది. గతంలో నిర్మించిన 488 మీటర్లు (1,601 అడుగులు) వున్న వంతెన రికార్డును తనే అధిగమించింది.  తాజాగా 550 మీటర్ల పొడవు( 1,804అడుగులు) గల వంతెనను చైనా నైరుతి ప్రాంతంలోని హుయాంగ్సు ప్రావిన్సులో నిర్మించింది. ఇది ప్రపంచంలోనే అత్యంత పొడవైన గాజు వంతెన. సుందరమైన జలపాతాలు, సున్నపురాయి నిర్మాణాలతో ఈ ప్రాంతం చాలా ఆహ్లాదభరితంగా వుంటుంది. అందుకు మరింత వన్నె తెస్తూ గాజు వంతెనను నిర్మించారు. ఈ వంతెనను వచ్చే నెలలో ప్రారంభిస్తామని ప్రాజెక్టు డైరెక్టర్‌ పాన్‌ జావోఫు వెల్లడించారు. ప్రకృతిని ఆస్వాదించేవారికి ఈ ప్రదేశం మంచి మనోల్లాసాన్ని ఇస్తుందని అన్నారు. ‘గాజువంతెనపై నడక ఒక ఛాలెంజింగ్‌ అనే చెప్పాలి. ఎత్తైన ప్రాంతాల్లో అదీ గాజు వంతెనపై నడవటం థ్రిల్ కలిగిస్తుంది. విశ్రాంతి, వినోదం, ప్రేరణ, క్రీడలు, ఆరోగ్య సంరక్షణ వంటి అంశాలను దృష్టిలో పెట్టుకుని పర్యాటకుల సౌకర్యార్థం ఓ రిసార్ట్‌ను కూడా ఏర్పాటు చేస్తున్నాం. ఇక్కడి గుహలో రెస్టారెంట్‌ కూడా ఉంది. ఇక్కడికి వచ్చినవారి ట్రిప్ స్వీట్ మెమొరీ అయిపోగలదు. మార్చిలో ప్రారంభించిన ఈ వంతెన నిర్మాణం పూర్తయ్యేసరికి 1 మిలియన్‌ డాలర్ల వ్యయం అయింది’ అని తెలిపారు. ఎత్తైన ప్రదేశాలను చూస్తే భయపడేవారికి ఈ వంతెనపై నడక ఆ భయాన్ని పోగొడుతుందని కొందరు సోషల్ మీడియాలో తమ అభిప్రాయాలను వెలిబుచ్చుతున్నారు.