అమెరికా విదేశాంగ సహాయమంత్రి జాన్ సుల్లివన్ భారత్, భూటాన్ దేశాల్లో ఈ నెల 11 నుంచి 17 వరకు పర్యటించనున్నారు. ఇండో-పసిఫిక్ ప్రాంతంలో కీలకంగా ఉన్న ఈ రెండు దేశాలతో అమెరికా సంబంధాలను మరింత బలోపేతం చేసే దిశగా ఆయన పర్యటన కొనసాగనుంది. ఈ మేరకు అమెరికా విదేశాంగ శాఖ ఓ ప్రకటనలో వెల్లడించింది. భారత పర్యటన సందర్భంగా కేంద్ర విదేశాంగ మంత్రి ఎస్. జైశంకర్‌తో సమావేశం కానున్నారు. అనంతరం భారత్-అమెరికా ఫోరమ్‌లో ప్రసంగించనున్నారు. భారత్, పాకిస్తాన్ మధ్య తీవ్ర ఉద్రిక్త పరిస్థితులు నెలకొన్న నేపథ్యంలోనే సుల్లివన్ పర్యటన చోటు చేసుకోనుండడంతో ఆయన పర్యటనపై విశేష ఆసక్తి నెలకొంది.