ప్రపంచాన్ని కదలిస్తున్న ఫోటో ..

అంతర్యుద్ధంతో, ఉగ్రదాడులతో చితికిపోతున్న సిరియాలో జీవన ప్రమాణాలు రోజురోజుకు అడుగంటుతున్నాయి. లక్షలాదిమంది నిరాశ్రయులవుతున్నారు. ఉండడానికి గూడు లేక, తినడానికి తిండిలేక ప్రజలు అల్లాడిపోతున్నారు. చివరికి ఐక్యరాజ్య సమితి కూడా ఏమీ చేయలేని పరిస్థితి. బాధితులకు ఆపన్నహస్తం అందించడం, వారి కడుపు నింపే ప్రయత్నం చేయడం మినహా మరేమీ చేయలేని నిస్సహాయత.
తాజాగా, ఓ శిబిరంలో తలదాచుకున్న వారికి ఆహారం సరఫరా చేస్తుండగా తీసిన ఫొటో ఇది. ఓ వైద్యుడు అందరికీ రొట్టెలు సరఫరా చేస్తూ ఓ చిన్నారి వద్దకు వచ్చాడు. ఆకలితో అలమటిస్తున్న ఆ బాలుడు దానిని అందుకోకుండా.. ‘‘మీరు నాకు ఆకలి వేయకుండా మందు ఉంటే ఇవ్వగలరా.. మరోమారు రొట్టె ముక్క కోసం ఎదురుచూసే బాధ తప్పుతుంది?’’ అని దీనంగా ఆడగడంతో ఆ వైద్యుడి హృదయం ద్రవించిపోయింది. చిన్నపిల్లాడిలా వలవలా ఏడ్చేశాడు. సిరియాలో జరుగుతున్న మానవ హక్కుల ఉల్లంఘనకు, అక్కడి ప్రజల దుర్భర జీవనానికి అద్దం పట్టే ఇలాంటి ఘటనలు ఎన్నో. వెలుగులోకి వచ్చేవి కొన్నే. సోషల్ మీడియాలో వైరల్ అవుతున్న ఈ ఫొటో ఇప్పుడు ప్రపంచంతో కన్నీరు పెట్టిస్తోంది.