అందరికి ఆదర్శంగా నిలుస్తున్న వైసీపీ ఎమ్యెల్యే

అనంతపురం జిల్లాలో శింగనమల ఎస్సీ నియోజకవర్గం ఎమ్మెల్యే జొన్నలగడ్డ పద్మావతి సంచలన నిర్ణయం తీసుకున్నారు. ఆమె తీసుకున్న నిర్ణయం ఇప్పుడు రాజకీయంగా తీవ్ర చర్చకు దారితీసింది. తన నియోజకవర్గంలోని అధికారులు, తన అనుచరులు  ఎవరు కూడా లంచాలు తీసుకోవద్దని గట్టి హెచ్చరిక చేశారు. ఈ మేరకు సోషల్ మీడియాలో లంచాలు తీసుకోవద్దంటూ  ఆమె పోస్టు చేసి షేర్ చేసింది. అయితే పద్మావతి తీసుకున్న ఈ నిర్ణయం వెనుక మర్మం ఉందని రాజకీయ చర్చ సాగుతోంది. మొన్నటి ఎన్నికల్లో శింగనమలలో 50 వేల పైచిలుకు ఓట్ల ఆధిక్యంతో వైసీపీ అభ్యర్థి జొన్నలగడ్డ పద్మావతి గెలుపొందారు. తనకు మంత్రి పదవి వస్తుందని ఊహించింది. కానీ కుల సమీకరణాల నేపథ్యంలో పెనుకొండ శాసనసభ్యుడు శంకరనారాయణకు మంత్రి పదవి వరించింది. పద్మావతి మాత్రం డీలా పడకుండా తన ప్రయత్నాన్ని ఆపడం లేదు. రాబోయే రోజుల్లో మరో సారి మంత్రివర్గ విస్తరణ ఎలాగూ ఉంటుంది. అప్పుడైనా తనకు మంత్రి పదవి దక్కకుండా పోతుందా అనే ఉద్దేశంలో ఉందట పద్మావతి. అందులో భాగంగానే తనపై ఎటువంటి అవినీతి మరకులు లేకుండా జాగ్రత్త పడుతోందట. ఇక అవినీతిపై సీఎం జగన్ కూడా తరచూ మాట్లాడుతూన్నారు. తాను సోషల్ మీడియా వేదికగా తీసుకున్న నిర్ణయం వల్ల పద్మావతి కూడా అవినీతిపై పోరాటం చేస్తోందన్న సంకేతాలు జగన్ కు వెళతాయి. అది తనకు కలిసి వస్తుందనే ఆశలో ఉంది పద్మావతి. అయితే ఆమె నిర్ణయంపై విపక్ష నేతల నుంచి భిన్న వాదనలు వినిపిస్తున్నాయి. తనకు రావాల్సిన వాటాలు రాకపోవడంతోనే ఈ నిర్ణయం తీసుకున్నట్లు రాజకీయ గుసగుసలు వినిపిస్తున్నాయి. స్థానికులు మాత్రం ఎమ్మెల్యే తీసుకున్న నిర్ణయం గొప్పదని అంటున్నారు. లంచాలపై పద్మావతి చేస్తున్న పోరాటాన్ని మిగతా వారు కూడా ఆదర్శంగా తీసుకోవాలని ప్రజలు చర్చించుకుంటున్నారు. ఇక పద్మావతి సోషల్ మీడియాలో చేపడుతున్న అవినీతి పోరాటం భవిష్యత్ లో ఆమెకు మంత్రి పదవి వరించేలా చేస్తుందో లేదో చూడాలి.