కేసీఆర్ తాతయ్య..మమ్మీ వాళ్లతో చర్చించండి

తెలంగాణ ఆర్టీసి సమ్మెలో భాగంగా ఆదివారం మహిళా కండక్టర్ల ఆధ్వర్యంలో ఎంజీబీఎస్ లో నిరసన తెలిపారు. ఈ నిరసనలో ఓ మహిళా కండక్టర్ కూతురు ఆవేదనతో మాట్లాడిన మాటలు ఇప్పుడు యావత్ తెలంగాణ సమాజాన్ని కన్నీరు పెట్టిస్తున్నాయి. ఎంజీబీఎస్ లో మహాత్మా గాంధీ విగ్రహం సాక్షిగా ఆ చిన్నారి కన్నీరు పెడుతూ కార్మికుల ఆవేదనను తెలిపింది. ఆ చిన్నారి మాట్లాడుతూ.… “కేసీఆర్ తాతకు నమస్కారాలు. గత మూడు నెలలుగా మా అమ్మకు పైసల్లేవు. మేం దసరా, దీపావళి పండుగలు చేసుకోలేదు. అందరూ కొత్త బట్టలు కొనుక్కుని పండుగలు చేసుకుంటే మేం బట్టలు కొనలేదు. పండుగలు చేసుకోలేదు.  స్కూల్లో ఫీజు కట్టకుంటే పరీక్షలు రాయనివ్వలేదు. స్కూల్ కు రానివ్వడం లేదు. కేసీఆర్ తాతయ్య.. దయచేసి మమ్మీ వాళ్లతో చర్చించండి. మాలాగా అనేక మంది ఇబ్బంది పడుతున్నారు. దయచేసి వెంటనే చర్చలకు పిలవండి తాతయ్యా.” అని ఆ చిన్నారి రోధించింది. 

దీంతో పక్కనే ఉన్న మహిళా కండక్టర్లు కూడా కన్నీరు పెట్టుకున్నారు. ఈ ఘటనతో అక్కడ ఒక్కసారిగా నిశ్శబ్ద వాతావరణం నెలకొంది.  ఆ చిన్నారి విజ్ఞప్తితోనైనా సీఎం కేసీఆర్ ఆర్టీసి కార్మికులతో చర్చించాలని పలువురు కోరుతున్నారు.