కాశ్మీర్ అంశంలో బయట దేశాల జోక్యాన్ని సహించం- సయ్యద్‌ అక్బరుద్దీన్‌

జమ్ముకశ్మీర్‌ రాష్ట్రానికి స్వయం ప్రతిపత్తి కల్పిస్తున్న 370 అధికరణ రద్దు చేశామని, ఈ నిర్ణయం విషయంలో ఎటువంటి మార్పు ఉండదని ఐక్యరాజ్య సమితిలో భారత్‌ శాశ్వత ప్రతినిధి సయ్యద్‌ అక్బరుద్దీన్‌ తెలిపారు. సమావేశం ముగిశాక భారత రాయబారి సయ్యద్ అక్బరుద్దీన్ మాట్లాడుతూ... ఆర్టికల్ 370 రద్దు చేయడమన్నది పూర్తిగా భారతదేశ ఆంతరంగిక వ్యవహారమని, ఇందులో ఇతర దేశాలకు ఎలాంటి సంబంధం లేదని అన్నారు. ఆ ప్రాంతంలో ఆర్థిక, సామాజిక ప్రగతిని దృష్టిలో పెట్టుకునే భారత ప్రభుత్వం ఈ నిర్ణయం తీసుకుందని ఆయన అన్నారు.

జమ్మూకశ్మీర్‌లో సాధారణ పరిస్థితులు నెలకొనేలా చేయడానికి చర్యలు చేపట్టామని చెప్పిన అక్బరుద్దీన్ పాకిస్తాన్ మీద కూడా వ్యాఖ్యలు చేశారు. జిహాద్ గుురించి, హింస గురించి ఒక దేశం మాట్లాడుతోందని, హింసాత్మక కార్యకలాపాలను ఎట్టి పరిస్థితుల్లోనూ అనుమతించేది లేదని అన్నారు.పాకిస్తాన్ కనుక భారతదేశంతో చర్చలు జరపాలంటే ముందుగా ఉగ్రవాదాన్ని నిరోధించాలని అక్బరుద్దీన్ కోరారు.