మహారాష్ట్ర ముఖ్యమంత్రి ఫడ్నవీస్ రాజీనామా

మహారాష్ట్రలో రాజకీయాలు క్షణం క్షణం మారుతున్నాయి. డిప్యూటీ సీఎం పదవికి అజిత్ పవార్ రాజీనామా చేసిన కాసేపటికే ముఖ్యమంత్రి దేవేంద్ర ఫడ్నవీస్ రాజీనామా చేశారు. రాజ్ భవన్ లో గవర్నర్ ను కలిసి రాజీనామా లేఖ సమర్పించారు.రేపు సాయంత్రం 5గంటల వరకు అసెంబ్లీలో బల పరీక్ష నిర్వహించుకోవాలని సుప్రీం కోర్టు తీర్పునిచ్చింది. ఈ నేపథ్యంలో అసెంబ్లీలో బలపరీక్షకు ముందే ఫడ్నవీస్ రాజీనామా చేశారు. తమకు కావల్సిన సంఖ్యాబలం లేకపోవడంతో రిజైన్ చేస్తున్నట్లు స్పష్టం చేశారు.

సీఎం ఫడ్నవీస్ రాజీనామా చేయడంతో రాష్ట్రంలో మహా ట్విస్ట్ లు చోటు చేసుకుంటున్నాయి. సీఎంగా ప్రమాణం చేసిన మూడు రోజులకే ఫడ్నవీస్ రాజీనామా చేయడం రాజకీయాల్లో తీవ్ర ఆసక్తిని రేపుతున్నాయి. శివసేన, ఎన్సీపీ, కాంగ్రెస్ పార్టీలు కూటమిగా ఏర్పడి నిన్న సాయంత్రం 7గంటలకు 162మంది ఎమ్మెల్యేలతో పరేడ్ నిర్వహించాయి. దీంతో తగినంత సంఖ్యాబలం లేకపోవడంతో రాజీనామా చేస్తున్నట్లు ఫడ్నవీస్ చెప్పారు. ఇతర పార్టీల ఎమ్మెల్యేలను ప్రలోభ పెట్టబోమని, బాధ్యతాయుతంగా ప్రతిపక్ష పాత్ర పోషించేందుకు సిద్ధంగా ఉన్నామని ప్రకటించారు. మహారాష్ట్ర ప్రజలు మహాయుతికే పట్టంకట్టారని ఫడ్నవీస్ అన్నారు. బలబలాలు చూశాక శివసేన బెదిరింపులకు దిగిందని, విడతలవారీ సీఎం పదవిపై శివసేన పార్టీకి ఎలాంటి హామీ ఇవ్వలేదన్నారు.

ముఖ్యమంత్రి పదవి విషయంలో శివసేన బెదిరింపులకు పాల్పడిందని ఫడ్నవీస్ పేర్కొన్నారు. శివసేన నేతలు మొత్తం అబద్దాలు ఆడుతూ ఇతర పార్టీల నేతలతో మంతనాలు జరిపారని ఆరోపించారు. తమకు సంఖ్యాబలం లేదని శివసేన చెప్పాకే.. గవర్నర్ తమకు అవకాశం ఇచ్చారన్నారు. శివసేన, ఎన్సీపీ, కాంగ్రెస్ పార్టీలవి భిన్న భావాజాలాలు అని.. ఇప్పుడు ఆ పార్టీలు కలిసి ప్రభుత్వాన్ని ఏర్పాటు చేయబోతున్నాయన్నారు. డిప్యూటీ సీఎంగా కొనసాగలేనని అజిత్ పవార్ తనకు చెప్పారన్నారు. శివసేన పార్టీ మోసం చేసి రాష్ట్రంలో రాజకీయ కల్లోలం సృష్టించిందని ఆరోపించారు.