పార్లమెంట్ లో ఏపీ విభజన లొల్లి

ప్రస్తుతం లోక్ సభలో ఆర్టికల్ 370 రద్దు పై చర్చ జరుగుతోంది. ఆర్టికల్ 3 ప్రకారం రాష్ట్ర సరిహద్దు మార్చాలంటే ఆ రాష్ట్ర అసెంబ్లీ అనుమతి తీర్మానం కావాలని కాంగ్రెస్ ఎంపీ మనీష్ తివారీ ప్రశ్నించారు. దీని పై స్పందించిన మంత్రి అమిత్ షా ప్రస్తుత జమ్మూ కాశ్మీర్ లో అసెంబ్లీ లేదని దానిని రద్దు చేశామని తెలిపారు. మరి మీరేలా ఏపీని విభజించారని వైసీపీ ఎంపీ వంగా గీత కాంగ్రెస్ ను ప్రశ్నించారు. దీని పై తివారీ స్పందిస్తూ ఏపీని విభజించినప్పుడు ఆ రాష్ట్ర అసెంబ్లీ తీర్మానం చేసిందని గుర్తు చేశారు. ఆంధ్రప్రదేశ్ విభజన సందర్భంగా యూపీఏ ప్రభుత్వం ఎలాంటి నిబంధనలనూ అతిక్రమించలేదని అన్నారు.

ఆర్టికల్ 370లో జమ్మూ, కశ్మీర్‌కు ప్రత్యేక అధికారాలు ఉన్నట్లే, ఆంధ్రప్రదేశ్ సహా పలు రాష్ట్రాలకు ప్రత్యేక అధికారాలను కల్పించారని, ఇప్పుడు కశ్మీర్‌కు ఆ అధికారాలు తొలగించారని, మరి మిగతా రాష్ట్రాల సంగతేంటి? అని ప్రశ్నించారు. హైదరాబాద్, జునాఘడ్‌లు ఇప్పుడు భారతదేశంలో అంతర్భాగం అయ్యాయంటే దానికి కారణం పండిట్ జవహర్‌లాల్ నెహ్రూ అని మనీష్ తివారీ అన్నారు. ఏపీ తెలంగాణ విభజన విషయంలో ఎక్కడా నిబంధనలు అతిక్రమించలేదని తివారీ స్పష్టం చేశారు. తివారీ సమాధానం పై వైసీపీ ఎంపీలు నిరసన వ్యక్తం చేశారు. వారికి మద్దతుగా బీజేపీ నేతలు కూడా నిరసన తెలిపారు.