టమోటో నగలతో వధువు....

పెళ్లి అంటే చాలు ఆడవారు ముఖ్యంగాచూసుకునేవి చీరలు, నగలు....తాజాగా ఓ పెళ్లి కూతురు నగలకు బదులుగా కూరగాయలతో అలంకరించుకుని వార్తల్లో నిలిచింది. వివరాల్లోకి వెళ్లగా....భారత్‌తో ఉద్రిక్తతల నేపథ్యంలో దిగుమతులు నిలిచిపోయి పాకిస్తాన్‌లో టొమాటో ధరలు ఆకాశాన్నంటాయి. బంగారం కన్నా టొమాటోకే ఎక్కువ డిమాండు ఏర్పడింది. తమ దేశంలో టొమాటో ధరలు ఏ రకంగా ఉన్నాయో ప్రపంచ దృష్టికి తీసుకెళ్లేందుకు ఒక వధువు పెళ్లిమండపంలో బంగారు ఆభరణాలకు బదులుగా టొమాటోలనే నగలుగా చేసుకుంది. ఆ పెళ్లికి వెళ్లిన ఒక జర్నలిస్టు ఇందుకు సంబంధించిన వీడియోను సోషల్ మీడియాలో పంచుకోవడంతో అది వైరల్ అవుతోంది. సాధారణంగా పెళ్లికుమార్తెకు బంగారు నగలు అలంకరించడం సాంప్రదాయం. అయితే ఈ వధువు మాత్రం నెక్లెస్, చెవిరింగులతోసహా ఆభరణాలన్నిటినీ టొమాటోలతోనే చేసుకుంది. తన పెళ్లికి తన తల్లిదండ్రులు మూడు బాక్సుల నిండా టొమాటోలు ఇచ్చారంటూ ఆ వధువు గొప్పగా చెప్పుకుని సంబరపడింది. బంగారం చాలా ఖరీదైనదే కాని ఇప్పుడు టొమాటోలు అంతకన్నా ఖరీదైనవి. అందుకే నగలకు బదులుగా టొమాటోలు ధరించాను అని ఆ వధువు చెప్పింది. తమ కుమార్తెలకు టొమాటోలు ఇచ్చిన తల్లిదండ్రులు ఎంతో గొప్పవారని కూడా ఆమె కితాబు ఇచ్చింది. గత వారం పాకిస్తాన్‌లో టొమాటో ధర కిలో రూ.300 దాటింది. ఉల్లి అయితే కిలో రూ. 90-100 పలుకుతోంది.