కోమటిరెడ్డి పాదయాత్రకు బ్రేక్

తెలంగాణ కాంగ్రెస్ నేత, భువనగిరి ఎంపీ కోమటిరెడ్డి వెంకట్ రెడ్డికి ఎదురుదెబ్బ తగిలింది. ఉదయ సముద్రం ప్రాజెక్టు పై ప్రభుత్వ నిర్లక్ష్యాన్ని ప్రశ్నిస్తూ నేటి నుంచి 30 వ తేది వరకు రైతు సాధన యాత్ర పేరుతో పాదయాత్ర నిర్వహిస్తానని కోమటిరెడ్డి ప్రకటించారు. నల్లగొండ పట్టణ శివారు నుంచి హైదరాబాద్ లోని జలసౌధ వరకు ఈ యాత్రను తలపెట్టారు. యాత్రకు అనుమతి కోరుతూ కోమటిరెడ్డి డీజీపికి కూడా లేఖ  రాశారు. కానీ శాంతి భద్రతల దృష్ట్యా యాత్రకు అనుమతి ఇవ్వలేమని నల్లగొండ ఎస్పీ తెలిపారు. దీని పై కోమటిరెడ్డికి నోటిసులు కూడా జారీ చేశామన్నారు. కానీ తనకు ఎటువంటి నోటిసులు అందలేదని కోమటిరెడ్డి వెంకట్ రెడ్డి అన్నారు. తన యాత్రకు ప్రభుత్వం అనుమతి ఇవ్వకపోవడం రాజకీయ కుట్రలో భాగమన్నారు. దీని పై హైకోర్టుకు వెళుతానని, హైకోర్టు అనుమతి తర్వాత పాదయాత్ర నిర్వహించే తేదీలను ప్రకటిస్తానని కోమటిరెడ్డి వెంకట్ రెడ్డి తెలిపారు.