పాదయాత్ర చేయనున్న కోమటిరెడ్డి

తెలంగాణలో టీఆర్ఎస్ పార్టీకి బీజేపీ తోకపార్టీలా మారిందని భువనగిరి ఎంపీ కోమటిరెడ్డి వెంకటరెడ్డి అన్నారు. బీజేపీ హడావుడి చేస్తుంది తప్పా విషయమే లేదన్నారు. గత అసెంబ్లీ ఎన్నికల్లో కొన్ని కారణాల వల్లే కాంగ్రెస్ పార్టీ అధికారం కోల్పోయిందన్నారు. పరోక్షంగా చేజేతులా చేసుకున్న పొరపాట్ల వల్లే రాష్ట్రంలో కాంగ్రెస్ పార్టీ అధికారానికి దూరం అయ్యిందన్నారు. వచ్చే ఎన్నికల్లో కాంగ్రెస్ ను అధికారంలోకి తీసుకువచ్చేందుకు తాను కృషి చేస్తానని తెలిపారు. ఈనెల 26 నుంచి 29 వరకు బ్రాహ్మణవెల్లంల ఉదయసముద్రం ప్రాజెక్టు కొరకు నార్కట్ పల్లి నుంచి పాదయాత్రం చేపడుతానన్నారు. ప్రజలకు తాగునీరు, సాగునీరు అందించడమే తన లక్ష్యమన్నారు. ఈ నెల 26 నుంచి 3 రోజుల పాటు సాగే పాదయాత్రలో పెద్ద ఎత్తున ప్రజలు పాల్గొనాలని ఆయన పిలుపునిచ్చారు. కోమటిరెడ్డి వెంకట్ రెడ్డి పాదయాత్రను ఎంచుకోవడం హాట్ టాపిక్ గా మారింది. రాష్ట్రవ్యాప్తంగా పాదయాత్ర చేసి కాంగ్రెస్ పార్టీని అధికారంలోకి తీసుకొస్తానని గతంలో కోమటిరెడ్డి ప్రకటించారు. అవసరమైతే రాష్ట్రమంతా పాదయాత్ర చేస్తానని ఇటీవల కూడా ప్రకటించారు. కోమటిరెడ్డి వెంకట్ రెడ్డి వైఎస్ రాజశేఖర్ రెడ్డి శిష్యుడు. ఆయన వల్లే తాను ఈ స్థాయిలో ఉన్నానని ఎప్పుడూ చెబుతుంటాడు. వైఎస్ లా ప్లాన్ చేస్తున్న కోమటిరెడ్డి వ్యూహం ఫలిస్తుందో లేదో చూడాలని నేతలు, కార్యకర్తలు చర్చించుకుంటున్నారు.