మంత్రి ఈటలకు పదవి గండం ?

తెలంగాణ ఆరోగ్యశాఖ మంత్రి ఈటల రాజేందర్ కు పదవి గండం వచ్చి పడింది. ముఖ్యమంత్రి కేసీఆర్ ఈటలపై గుర్రుగా ఉన్నారనే ప్రచారం జరుగుతోంది. సీఎం కేసీఆర్ ఎంతో ప్రతిష్ఠాత్మకంగా తీసుకువస్తున్న రెవెన్యూ చట్టంపై మంత్రి ఈటల రాజేందర్ రెవెన్యూ అధికారులకు లీక్ ఇచ్చారని ప్రచారం జరుగుతుంది. చట్టానికి సంబంధించిన విషయాలను అధికారులకు చేరవేశాడనే కోపంతోనే ఆయనను మంత్రి పదవి నుంచి తొలగిస్తారని రకరకాల ఊహాగానాలు వస్తున్నాయి. ఇది ఎంతవరకు నిజమో కాదో తెలియదు కానీ రాష్ట్ర వ్యాప్తంగా దీనిపై హాట్ హాట్ గా చర్చలు నడుస్తున్నాయి. రెవెన్యూ చట్టంపై మంత్రులు, కలెక్టర్లు ఎక్కడా బయటకు చెప్పొద్దని సీఎం కేసీఆర్ ఆదేశాలు జారీ చేశారు. అయితే కొత్త రెవెన్యూ చట్టం వద్దని అధికారులు, ఉద్యోగులు కోరుతున్న సమయంలో లీకులన్నీ ఓ పెద్ద అధికారికి మంత్రి ఈటల చేరవేసినట్లు కొన్ని పత్రికలు వార్తలు రాశాయి.  

తెలంగాణ ఉద్యమ సమయం నుంచి కేసీఆర్ కు ఈటల చాల సన్నిహితుడు. తొలిసారి టీఆర్ఎస్ ప్రభుత్వం ఏర్పడ్డాక ఎంతో ప్రాధాన్యమైన ఆర్థిక శాఖను కేటాయించారు. అయితే రెండోసారి టీఆర్ఎస్ అధికారంలోకి వచ్చాక ఈటలకు మంత్రి పదవి ఇచ్చేందుకు కేసీఆర్ అయిష్టత చూపారని, చివరి నిమిషంలో ఈటలకు మంత్రి పదవిని ఇచ్చి, అంతగా ప్రాధాన్యం లేని ఆరోగ్యశాఖను అప్పజెప్పారని ఊహాగానాలు వచ్చాయి. రాష్ట్రవ్యాప్తంగా జరుగుతున్న చర్చలు, ప్రచారంపై రెవెన్యూ ఉద్యోగుల సంఘం ప్రతినిధులు స్పందించారు. తమకు సమాచారం ఇచ్చారన్న ప్రచారాన్ని వారు ఖండించారు. లీకులు ఇచ్చారన్న వార్తలు అవాస్తవమని, తాము కలిసిన సందర్భాలను అసత్య కథనాలతో ముడిపెడుతున్నారని రెవెన్యూ ఉద్యోగుల సంఘం ప్రతినిధులు స్పష్టం చేశారు. అయితే రెండు తెలుగు పత్రికలకు మాత్రమే లీకుల వ్యవహారంపై సమాచారం అందించడం అనుమానానికి తావిస్తోందని పలువురు అభిప్రాయపడుతున్నారు. మరి దీని పై మంత్రి ఈటెల రాజేందర్ ఏ విధంగా స్పందిస్తారో వేచి చూడాలి.