కోల్‌కతా నైట్‌రైడర్స్‌పై యువరాజ్ మండిపాటు...

కోల్‌కతా నైట్‌రైడర్స్ స్టార్ ఆటగాడు క్రిస్ లిన్‌ను వదులుకొని పెద్ద తప్పిదమే చేసిందని భారత ఆల్‌రౌండర్ యువరాజ్ సింగ్ పేర్కొన్నారు. విధ్వంసక బ్యాటింగ్‌కు మరో పేరుగా చెప్పుకునే లిన్‌ను కొనసాగించి ఉండాల్సిందని యూవీ అభిప్రాయపడ్డారు. ఒకటి రెండు మ్యాచుల్లో విఫలమైనంత మాత్రాన లిన్ వంటి ఆటగాడి సామర్థ్యాన్ని తగ్గించి చూడడం సరికాదన్నారు. లిన్ ఉంటే కోల్‌కతా బ్యాటింగ్ మరింత బలోపేతంగా ఉండేదని, అతన్ని తప్పించి కోల్‌కతా పెద్ద పొరపాటే చేసిందని యువరాజ్‌ పేర్కొన్నారు. తొలి బంతి నుంచే ప్రత్యర్థి బౌలర్లపై విరుచుకు పడే సత్తా లిన్‌కు ఉందన్నారు . పొటీ ఫార్మాట్‌లో లిన్ చాలా కీలక ఆటగాడని, అతనిలా విధ్వంసక ఇన్నింగ్స్ ఆడడం అందరికీ సాధ్య పడదని యూవీ చెప్పుకొచ్చారు. ఈ విషయాన్ని ఎలాగైనా కోల్‌కతా ఫ్రాంచైజీ యజమాని షారూఖ్ ఖాన్ దృష్టికి తీసుకెళుతానని యువీ పేర్కొన్నారు .