టీఆర్ఎస్ నాయకుని హత్యకు కుట్ర

వారిద్దరూ హైదరాబాద్ లో పేరు మోసిన రౌడీషీటర్లు. రాజేంద్రనగర్ లో గత పది సంవత్సరాలుగా ఆధిపత్యం కోసం పోరాడుతున్నారు. వీరి మధ్య ఆధిపత్య గొడవలు  ఈ మధ్య పతాక స్థాయికి చేరుకున్నాయి. దీంతో ప్రత్యర్దిని అంతమొందించాలని ఓ వర్గం గ్యాంగ్ లీడర్ ప్లాన్ చేశాడు. ఇటీవల ఓ గ్యాంగ్ లీడర్ టీఆర్ఎస్ పార్టీలో చేరి లీడర్ గా మారాడు. రాజకీయ లబ్ధితో అతని ఆగడాలు పెరిగిపోవడంతో ప్రత్యర్ధి లీడర్ అతన్ని చంపాలని ప్లాన్ వేశాడు. మహారాష్ట్రలో ఓ సుఫారీ గ్యాంగ్ తో ఒప్పందం కుదుర్చుకున్నాడు. వారికి సుఫారీ ఇచ్చి అతని హత్యకు ప్రణాళికలు చెప్పి వచ్చాడు. ఈ విషయం పోలీసులకు తెలియడంతో అతని పై నిఘా ఉంచారు. ఇంతలోనే మహారాష్ట్ర నుంచి సుఫారీ గ్యాంగ్ షాద్ నగర్ చేరుకుంది. ముందుగానే అలర్ట్ గా ఉన్న ఎస్ వోటీ పోలీసులు వారిని అరెస్ట్ చేసి వారి నుంచి 7 తుపాకులు, 2 కత్తులు స్వాధీనం చేసుకున్నారని సమాచారం. దీనికి సంబంధించి ఎటువంటి వివరాలు తెలుపకుండా సైబరాబాద్ పోలీసులు గోప్యంగా ఉంచారు.